حجّت ذات خدا، محبوب جاناندی علی
جانشین حضرت ختم رسولاندی علی
سرور عالم، امام کون و امکاندی علی

صاحب شأن و مقام و عزّ و رجحاندی ­علی
ای جوانمردان عالم! شاه مرداندی علی

هر داشی انگشتر زرّینه من قاش بیلمرم
ارزل­النّاسی اعزّالنّاسیدن باش بیلمرم
حیدرین منکرلرین ئولسمده قارداش بیلمرم

هئچ نه وحدت نه تقیّه باشیمه کئچمز منیم
دشمن شاه ولایت دشمنیمدی دشمنیم

دینیمی من­ حیدرین عشقیله تحکیم ائتمیشم
زندگی برنامه­می عشقیمله تنظیم ائتمیشم
من علینون­ عکسینی قلبیمده ترسیم ائتمیشم

بیر دلاور قهرمانی چکموشم چوخ باوقار
بیر الینده واردی قرآن بیر الینده ذوالفقار

من علینون آدینه بو جانی قربان ایلرم
یاعلی ذکرین اورکدن هر دم عنوان ایلرم
گونده اوچ دفعه اذاندا عشقه اذآن ایلرم

تا وار عمروم دشمن حیدرله پیکار ایلرم
سسلرم من یاعلی وهّابی­نی خوار ایلرم

راوی نقل ایلور ائلیکی حقّینه چاتدی علی
عدل و دادی برقرار ائتماقه باز اولدی الی
قویدی اجرایه قوانین رسول مرسلی

فاش ائدوب عالملره بو سرّی شاه لافتا
نه ابوبکر و عمر حقدی، نه عثمان دغا

دولت دینی او دم کی قوردی سلطان ولا
ایستدی اسلامیاندان صدقیلن بیعت آلا
مملکتده تا نظامین پایه­سی محکم اولا

حق­طلبلر عزم ائدوب حیدر حضورین سربه­سر
ائتدیلر تعظیم او شاهین اللریندن اوپدولر

اهل­تاریخ اولسا گر واقفدی­کی اول عصریده
چوخ یئره تاپمیشدی ال اسلام فتح­ونصریده
حاکمیدی شامیده، ایراندا، روم و مصریده

گسترش تاپمیشدی شرق و غربه مرز دولتی
کشور دینون اوجالموشدی جلال و شوکتی

چون او شه اولدی خلیفه نامه یازدی هریئره
والی­لر بیعت ائدوب اؤز حُسن ظنّین گؤستره
تا امور امّته آسوده­تر سامان وئره

دولتین اوّلده مستحکم ائدوب شاه زمن
هر دیاره گؤندروبدی نامه از جمله یمن

نامه­ده یازدی یمن والی­سینه میر عرب
ترک ائدوب دنیانی عثمان، ایندی یابن­منتجب
بیعت ایله حیدره، حیدردن آل والی لقب

مرتضایه وئرمسون بیعت الی معزول­سن
آستان دولت قرآندا نامقبول­سن

بیرده­منظوریم بودی بیعت­گر ائتسون قیل­عمل
ایستورم من اولمویا رکن حکومتده خلل
آختاروب ملک یمندن هر دِه و شهری اول

 اون نفر تاپ مرد تقوا، مرد ایمان، مرد دین
صاحب شخصیّت و علم و کمالات و یقین

ایستورم اول اون نفر شخص برازنده اولا
آسمان علم و دینده ماه تابنده اولا
جانب خلق یمندن تا نماینده اولا

منله یثربده گلوب صدقیله بیعت ایلیه
خالق و مخلوقه بو دنیاده خدمت ایلیه

چون­کی مکتوب همایونی یئتیشدی مقصده
گؤردی والی حضرتین فرمانی­نی اول نامه­ده
اؤپدی ال قویدی­گؤز اوسته امرینی اجرا ائده

جمع ائدوب اطرافیانون فوری شورا ایلدی
فی­الزّمان بیر هیأت اجرایی برپا ایلدی

سس دوشوب ملک یمنده ای گروه متّقین
ایستیوب دیداره اون مؤمن امیرالمؤمنین
آرزو ائتدی چوخی اؤپسون او مولانون الین

امر اولوب کلّ یمندن جمع اولوبدی یوز نفر
یوز نفر شایسته عالم، یوز نفر فرزانه­لر

یوز نفردنده اؤتوز مرد موثّق سئچدیلر
اون نفر اول جمعیدن دیندار مطلق سئچدیلر
عرصۀ علمیله تقواده موفّق سئچدیلر

اولدی گلچین اون نفر مردان علم و اجتهاد
هامّی اول اون عالمه وئردیله رأی اعتماد

اوللارا اهل یمن دست صداقت وئردیلر
ائتماقا مولاییلن بیعت ولایت وئردیلر
ایلیوب یعنی نماینده وکالت وئردیلر

قیلدیلار قصد مدینه، دلده شور و اشتیاق
اولدولار چوخ چکمدی شهر پیمبرده قوناق

 گؤردولر شهر مدینه حالت بیداری­ده
شور و شادی موج ائدور هر کوچه و بازاریده
گؤرسنور شوق و طراوت چهرۀ احراریده

گوییا باشه چاتوبدی ظلم و عصیان ایللری
هم ابوبکر و عمر عصری، هم عثمان ایللری

حق چاتوب حقداره عدلین دولتی برپا اولوب
غاصبان مسند دین دهریده رسوا اولوب
شادیدی مظلوملر عهد جفا ملقا اولوب

اگلشوب تخت ولایتده علی­المرتضی
تا مسلمانلاره اولسون پیشوا و رهنما

مسجده وارد اولوب نوّاب احفاد یمن
گؤردولر منبرده­دی شاهنشه عصر و زمن
صدقیلن دین اهلینه ایلوردی ایراد سخن

سینه­ده دست ادب دیلده هامی عرض سلام
ائتدیلر سلطان عدل و داد، علیّه احترام

مسجدین صحنینده تاگؤردی اولاری­بوتراب
آلدی اول جمعین سلامین ایلدی ردّ جواب
اندی­منبردن دوتوب ئوز اوللارا قیلدی­خطاب

خوش­گلوبسوز ای یمن اقصاسینون جانانلاری
یورماسین الله سیزی ای مرتضی مهمانلاری

حق سیزه ائتسون مدد بانام حق گفتار ائدون
یاور اولسوز دولت اسلامه گر اظهار ائدون
واقفم مقصودوزه گرچه، اؤزوز تکرار ائدون

آشکارا ایلیون بیعت موافق­سوز اگر
یار اولون بو یاور قرآنه صادق­سوز اگر

مسجد اهلی­گؤز تیکوب دقّتله یکسر صحنیه
بیربیره باخدی اول عدّه کیمدی گفتار ایلیه؟
پادشاه عالم ایجاده پیغامین دئیه

گؤردولر اول اون نفردن بیر نفر گلدی دیله
باشلادی اؤز سؤزلرین ابراز ائدور مین شوریله

سویلدی یا مرتضی! ای سرور مردان دین!
ای امام اهل ایمان! یا امیرالمؤمنین!
ای یگانه نائب برحقّ ختم­المرسلین!

ییرمی­بش­ایل حقّینی اهل شرارت غصب ائدن!
مسندینده جهل دوران اشقیانی نصب ائدن!

ای شه ملک ولا! ای جنّ و انسانه امیر!
وی رسول مصطفایه هم وصیّ و هم وزیر!
شأن و اجلالی گلن اظهاره فی یوم­الغدیر!

ای مقام و منزلتده نفس پیغمبر اولان!
لایق امر امامت اللها مظهر اولان!

سن امام­المتّقین­سن، سن ولیّ­الله­سن
حجّة­اله­سن، رموز عالمه آگاه­سن
آستان کبریاده مرد صاحب­جاه­سن

شأنوی مولا! بیر الله، بیر رسول­الله بیلر
کیمده وار ایمان سنی ارض و سمایه شاه بیلر

سن علی­المرتضی، عشّاقه سرورسن آقا!
ذوالفقارین صاحبی، فتّاح خیبرسن آقا!
عمروکُش، مرحب­ییخان، غیرتلی حیدرسن آقا!

گر لیاقت یوخدی بیزده تا دوداقوندن اؤپک
وئر اجازه خم اولوب مولا ایاقوندن اؤپک

یاعلی! بیز ملک احرار یمندن گلمیشوک
ایلیوب بیعت آلاق دستور سندن گلمیشوک
شوقیلن دیداره بیردیللی وطندن گلمیشوک

گلمیشوک صدق دلی ابراز ائداق مولا سنه
باش­وجاندان­کئچمیشوق باش اگمگه تنها سنه

ثبت ­ائدوب تاریخ او شخصین موبه­مو گفتارینی
گؤردی یکسر اهل مجلس شیوۀ رفتارینی
مدح و وصف مرتضاده سویلوین اشعارینی

مدح شاه لافتاده اؤزگه غوغا ایلدی
شوره گلدی اهل مجلس نطقونه احسن دئدی

دقّتیله باخدی اول شخصه علی­المرتضی
عالِم­الاسراریدی، اسراری گؤردی برملا
گؤزلرینده بیلمورم نه گؤردی، چشمان خدا

اولمادی اغفال اول شعر و شعاریندن اونون
ئوز دوتوب آلدی خبر ایل و تباریندن اونون

قیلدی فرمایش مرادی­سن؟ منه ایله بیان
عبدرحماندی آدون؟کشف ایله حضّاره عیان
عرض­قیلدی سن اؤزون آگه­سن ای­جان­جهان!

فاش­ائدوب­اصحابه­آدین­چون او شاهنشاه اونون
باخدی عرشه سسلدی «انّا إلیهِ راجِعون»

بو قضادن حیرته دوشدی او مجلس یکسره
خیره­خیره باخدی مردان یمانی بیربیره
بو نه جریاندی، نه ایش، یا للعجب! نه منظره

ابن­ملجم حضرته عشق و ارادتدن دئیور
حجّت یکتا گؤرن هانسی حکایتدن دئیور؟

گلدی گفتاری دئدی مرد یمانی یاعلی!
قویدون حیرتده ندن بو خسته­جانی یاعلی!
فاش ائله انصاروه سرّ نهانی یاعلی!

محضرونده گرچه مولا بندۀ نالایقم
باغریمی یاردون سنه من کی اورکدن عاشقم

قیلدی فرمایش­گؤزومده بیرگون اولدی­جلوه­گر
کوفه­ده، مسجدده، محراب ایچره، هنگام سحر
تیغ اشقی­الاشقیا ظلمیله فرقیمدن دگر

ئوزگؤزوم قانه باتار من کامکار اوللام او گون
قورتاروب غم­غصّه­لردن رستگار اوللام او گون

سویلدی یاسیّدی! بو سؤز منی خوار ایلدی
منقلب ائتدی بو رازون قلبیمی زار ایلدی
هامّونی حیران، منی درده گرفتار ایلدی

گر من ای جان جهان مجرم همین سوداده­یم
قتلیمون یاز حکمونی من ئولماقا آماده­یم

قیلدی فرمایش کی حاشا عبد کاملدی علی
الله عالمدی کی امراللهه عاملدی علی
بیلموسن آیا مگر سلطان عادلدی علی

جوهر عدلین فنا دنیاده معدوم ایلمز
هئچ­کیمی جرم ائتمه­میش عالمده محکوم­ایلمز

عرض قیلدی قلبیمی­قان ائتدی مولا! بو سخن
ایلرم اؤز عشقیمی، اخلاصیمی اثبات من
محضرونده قاللام ای شه! ائتمرم عزم یمن

درگهونده خدمت ای سلطان دوران! ایلرم
مقدمونده جانیمی عشقیله قربان ایلرم

الغرض­ کچدی او گون یاران! دولاندی روزگار
ایلیوب بیعت یمن اهلی او شاهه استوار
دوققوزی اوردان قاییتدی قالدی بیر تزویرکار

قالدی خدمت ایلیه امّا نه خدمت ایلدی
زینب مظلومه­نی غرق مصیبت ایلدی

بیلمورم صفّینیده دوتدی نئجه غفلت گؤزون
نیزه­ اوسته گؤرودی قرآنی ایتیردی تئز اؤزون
مکر کفره آللانوب درک ائتمدی مولا سؤزون

راه حقّی تاپمادی جهل و تعصّبدن بلی
دولدی اشقی­الاشقیانون قلبینه قهر علی

گؤردی بیر ایش عالم امکانه دوشدی ولوله
تیتردی عرشین ستونی، فرشه دوشدی زلزله
روضۀ رضواندا زهرا معجرین آلدی اله

نقش اولوب محرابه علم ­و عدل­ودادین هیکلی
سسلدی جبریل گویده شیعه­لر! ئولدی علی

بیلمورم زینب نئجه دؤزدی او دم باش­آچمادی
تیر آهین کوفه­ده قلب جهانه ساچمادی
ال باشیندا مسجده ساری هراسان قاچمادی

کربلاده قؤپدی امّا بیر قیامت زینبه
قویمادی قالسون اورکده صبر و طاقت زینبه

تلّیدن باخدی قیامت صحنه­سین ­گؤردی عیان
قانلی گوداله ییخوب عطشان حسینی کوفیان
دسته­دسته حمله ایلور اوخ­ویران، نیزه­ویران

نیزه­لر، اوخلار هواده سرعتیلن سان وئرور
قانلی گوداله دوشوب شاه شهیدان جان وئرور

دوره­سین­دشمن آلوب­یوخ­فکرینه بیرکس قالان
نیزه­سین آماده ایلور حضرتی آتدان سالان
یوخدی زهرا اوغلونی میداندا اللردن آلان

بیربیره سبقت ائدور مقتلده اشرار دغا
قانلی میداندا قیامتدی امام ئولدورماقا